كلمة رثاء لفقيد قلبي ولدي حمد زين الشباب .. نبيلة الكندري




ما تخيلت أني أدخل بيتنا وما اشوفك تستقبلني فيه كعادتك ، تعودت على شوفتك كل يوم في البيت ,لأنك الوحيد من عيالي اللي كله متواجد في البيت ( بيتوتي ) وحتى وأنا في بالمدرسة تتصل يما وينج وأتحلطم عليك وأقولك يعني وين ؟! بالـــدوام .


يوم ولادتك كان فرحة كبيرة لأني ولدتك بعد 7 سنوات من بعد ولادة أخوانك اللي أكبر منك سعد وفهد وكنت لعبة بالنسبة لهم , وكل سنة تكبر فيها يكبرون أخوانك وياك ويتعتبرونك مسؤوليتهم يلعبون وياك وينتبهون عليك.


ومرت السنين وكبرت وصرت شاب يعتمد عليك وسميتك حمد ( زين الشباب ) والله المفروض أسميك يا قلب أمك ( حمد الحامد الشاكر) صج !! كان لك من أسمك نصيب، لأنك كنت دايم تحمد الله وتشكره في كل حالاتك ( الفرحة والصعبة والحزينة والسعيدة) .


أصعب شي علي اليوم أني مو متخيلة اني ماراح أشوفك ولا راح أسمع صوتك مره ثانية ، فراقك صعب وعوَر قلبي وقلوب البيت كلهم وأحزن الكل اللي يعرفك واللي ما يعرفك ، والله يا فقيد قلبي دموعي انشفت من البجي عليك ، ولكن ما نقول الا ما يرضي ربنا ( انالله وانا إليه راجعون) .


عندي يقين وثقة بالله سبحانه بانك بحال أحسن وفي أمان الله ومكانك روضة من رياض الجنة انا ما اشوفك صج ولكن على يقين أن الله يشوفك و عينه الله سبحانه ترعاك ولأننا مؤمنين بقضاء الله وقدره فأقول اللهم لا اعتراض والانسان فاني والدوام لله سبحانه وتعالى .


فقدان الأحبة والغاليين على قلوبنا مكتوب عند الله خالقهم من يوم ولادتهم وهذا اللي يصبرنا على فراقك يا حبيبي ، الله يرحمك يا حبيبي ولدي حمد زين الشباب وأسكنك فسيح جناته , ولقاؤنا باذن الله تعالى في الجنة والخلود مع أحبابنا ، وأسأل الله يقر عيني برؤيتك في منامي وأن يبشرني ربي بأنك من شباب الجنة .

أمك الحزينة على فراقك
نبيلة الكندري

ترك الرد

من فضلك ادخل تعليقك
من فضلك ادخل اسمك هنا