ليه فيه ناس بيستغلونا عاطفياً؟!.

“Emotional abuse”
أو الاستغلال العاطفي هو واحد من أسوء أنواع الاستغلال اللي ممكن يعدي عليك كإنسان، وخسايرك فيه بتبقى مكلفة جدا لأنها من أغلى ما تملك وهي.. مشاعرك، نوع خبيث من الاستغلال كتير بنقع فيه من اللي حوالينا أو من حد حبيناه وأثاره ممكن تفضل مأثرة على حياتك وعلاقاتك لسنين أو لبقيت حياتك، وكتير بيكون مستخبي جوة مسميات عظيمة زي الحب، والتضحية، والجدعنة، والطيبة، والخوف من ربنا، وبر الأهل.. لكن في لحظة بنعرف إنه ماكنش أي حاجة من كل الحاجات الحلوة دي.

وخليني أقول لك الأول إيه مفهوم “الاستغلال العاطفي” ده أصلا.. علمياً بيقولوا عليه(Non physical behaviour) أو سلوك غير جسدي وبيشمل الأفعال اللي ممكن تؤدي في النهاية بشعور الطرف الأخر بالاهانة أو الاحباط أو كسرة القلب أو الشعور بالدونية أو التهديد أو الخجل أو أي ألم نفسي وأحيانا للمرض النفسي الحقيقي، هو طريقة غير سوية للتحكم في إنسان عن طريق مشاعره عشان ينفذ رغابات شخص أو تحقيق مصلحة أو فايدة منه، وده بيحصل في جميع أنواع العلاقات الأهل.. الصداقة.. الحب.. الجواز.. الشغل.. وحتى في الشارع، وبالمناسبة محدش فينا كبشر عموما عنده مناعة ضد استغلال عواطفه ومفيش حد ممكن يتفادى بنجاح طول الوقت اللعب بمشاعره.. لكن فيه ناس جربت ده فأصبح عندها قدر من الوعي تحمي بيه نفسها ومشاعرها في مواقف كتير.

وخطورته الحقيقة تكمن في إن استغلال مشاعرك ده بيكون كمان مدخل رئيسي لباقي أنواع الاستغلال.. زي (الاستغلال المادي) وده تشوفه في راجل أو ست بياخد الحب والمشاعر طريقة لأنه يحقق مصالح أو مكاسب مادية من ورا علاقة حب أو جواز، أو (الاستغلال الجنسي) زي راجل بيستخدم مشاعر ست كمفتاح بس للوصول لجسمها أو جوة علاقة جواز وهو بيستغل مشاعر خوفها من إنهيار بيتها أو طلاقها أو خيانته فابتديله العلاقة دي عشان ترضيه، أو (الاستغلال المعنوي) زي إن شخص بيستغل وجود طرف تاني عشان بس يسد له أي احتياج معنوي محتاجه زي ست بتحتفظ براجل في حياتها عشان بيحسسها بأمان أو بيقولها كلام حلو أو راجل مخلي ست في حياته عشان بتعرف تقف جنبه أو تدعمه وتديله ثقه في نفسه وهكذا، والأخطر هو إنه أوقات بيبقى فيه متعة مع الاستغلال لكن متعة مش كاملة.. متعة جاية من ألمك.. من استغلال مشاعرك.. جايز مبسوط بس حاسس برضه إن فيه حاجات بتتاخد منك وإنت مش مرتاح وأوقات بتكون أذياك لكن إنت مش قادر تقول لأ، أو مشاعرك غالبة عليك وحاسس إنها بقيت لعبة بزراير في أيد حد تاني بيحركها لخدمته وأهدافه وسعادته هو على حساب مشاعرك ونفسيتك وطاقتك إنت.

طيب.. الناس اللي بيستغلوا مشاعرنا بيعملوا كده إزاي؟.. دي ليها أشكال كتير.. ممكن يبقى في شكل (استغلال لفظي).. يعني الطرف اللي قدامك بيستخدم كلمات عميقة وجمل مؤثرة فيها ربنا والدين كتير وفيها قيم عظيمة وحب ومشاعر حلوة أو العكس كلها تهديد وتخويف وإهانة ونقد ولوم عشان بس يلعب بمشاعرك ويقدر يستغلك أو يسيطر عليك ويخليك تحت رحمته، كمان (التصرف بعدوانية).. وده شكل منتشر جدا من طرق الاستغلال العاطفي وهو إنك تلاقي حد قريب بيتصرف بعدوانية شديدة للضغط على مشاعرك لو رفضت طلبه أو اتأخرت فيه أو غلطت أو حصل مشكلة أو خلاف بينك وبينه؛ كمان ممكن يبقى في شكل إنه (يعزلك عن حياتك أو مجتمعك).. وده بيبان قوي لما اتنين بيرتبطوا أو بيتجوزوا فايقرر طرف فيهم يعزل التاني عن حياته وشغله وأهله وأصحابه عشان يقدر يتحكم فيه وفي مشاعره بالكامل؛ وفيه شكل كمان وهو إنه (يتهمك باللي مش فيك).. وهنا الشخص المستغل ده هايجننك ويكذب لك ودنك وعينيك ويفهمك إنك دايما بيتهيألك وكل اللي بتحسه مش حقيقي ومحتاج تتعالج وهايتهمك إنك شكاك وسئ النية فيوقعك في خناقه بين عقلك ومشاعرك وضميرك وكل حاجة؛ وأخر شكل هي حقنة مفعولها كبير اسمها (أنا لو كنت مكانك).. كنت عملت كده.. كنت اتصرفت التصرف الفلاني.. كنت هاعمله علشانك.. كنت هاضحيلك.. وهكذا… وبالتالي فورا تحس إنك الطرف الوحش الأناني المقصر اللي عايز الحرق فاتعمل اللي هو عايزه لكن باختيارك.

الناس المستغلين عاطفيا ناس أذكياء جدا.. وهو شخص عايز –دايما- ميزان القوة مايل ناحيته، ريموت العلاقة في أيديه، هو صاحب اليد العليا تملي أو -كونترول فرييك- زي ما بيقولوا وغالبا بيكون شخص نرجسي أو شخص من النوع الدحلاب بتاع الدخلات الناعمة والرومانسية الأفور دوز.. المهم إنه شخص بيجيد اللعب على حبال مشاعرك عشان ياخد منك أو يوصل للي هو عايزه، ده غير الضغط النفسي اللي هايعيشك فيه وفقد ثقتك في نفسك وتقديرك ليها والخوف اللي بيغذية جواك سواء.. خوف من طلاق، خوف من وحدة، خوف من كره، خوف من غضبهم لو أهلك.. إلخ.

وهنا.. هو ليه أصلا فيه ناس بيستغلونا عاطفياً؟.. الحدوتة أسبابها كتير.. جايز يكون غيران منك أو من نجاحك وعايز يهدك أو يسيطر عليك أو لمجرد إنه حاسس إنك أفضل وأقوى أو عشان ماتبقاش أحسن منه عاملا بمبدأ “العين ماتحبش اللي أحسن منها” وده بيحصل كتير في الشغل وطبعا بيحصل في العلاقات زي لو ست مثلا خدت منصب أعلى من جوزها أو بقى عندها عائد مادي أكبر منه فيتفنن إزاي يكسرها عاطفيا أو يضيع ثقتها في نفسها عشان يفضل المتحكم الأعلى، كمان –منطقيا- لأنه أكيد بيحقق مكاسب وفوايد كبيرة من ورا استغلاله ليك، كمان جايز محتاج الاهتمام أو التعاطف اللي إنت بتديهمله دايما ودي واضحة مثلا في الناس اللي بتقعد تعيطلك في كل حاجة أو تتدعي المرض أو تدعي على نفسها بالموت عشان تحقق لهم رغبتهم أو تفضل جنبهم وتستحملهم، أو ربما “بينتقم” منك أو من شخص تاني كان في حياته وعنده عقدة بيخلصها فيك وإنت مالكش ذنب فيها أصلا.

طيب إزاي تحمي نفسك من حد بيستغلك عاطفياً:
-تجنب التعامل المباشر الكتير معاه أو موجهته قدر الإمكان في حالة العلاقات اللي مفيش منها مفر، لكن لو علاقة تقدر تخرج منها وتهرب.. إهرب فورا من الدايرة المهلكة دي.
-إفهم إنه بيلعب بيك وبمشاعرك لمصلحته ولأهدافه.. يعني إنت مش وحش ولا مقصر ولا أناني ولا مجنون ولا مذنب زي ما هو بيحسسك.
-ماتقولش على كل حاجة طيب وحاضر وتنفذ طلباته على حساب نفسك عشان لا هو طلباته واستنزافه هايخلص ولا إنت مهما عملت هاتعرف ترضيه.
-إفهم إنه أضعف بكتير في الغالب من تهديداته اللي إنت عايش تحتها أو سايبه يستغلك بيها.. ودي عاملة كده زي أوضة الفيران اللي خوفونا بيها واحنا عيال.. عمرنا ما شوفناها بس كنا بنخاف وبنسمع الكلام.
-والأهم.. عامله دايما بالقدر اللي يحميك إنت ومشاعرك منه أولا وأخيرا.

ترك الرد

من فضلك ادخل تعليقك
من فضلك ادخل اسمك هنا