دسمان نيوز – مصر – حمادة دة اللي هينتشلك من بؤرة البؤس و اليأس و النكد و الإحباط انت صاحي الصبح مقرر مين اللي هيسيطر حمادة اللي هيدفن في الرملة و لا حمادة النداب اللي صاحي يقطع شرايينه.
حياتك هتتغير لما أفكارك تتبدل هتتحول من سلبي غارق في العصبية و المرض لشخص إيجابي عقله بياخده لحلول و يتعامل مع النعم بإدراك أكبر.
نصف تعاستك في الكلام اللي بتقوله لنفسك كل يوم… انا ضعيف انا وحيد انا فاشل انا متألم و قلبي مكسور انا عمري ما هحقق حاجة من أحلامي.
نصف قوتك في تغيير المياه اللي بتسقي بيها مخك كل يوم.. انا بعافر انا بتغير جربت تقول لنفسك كدة؟
قوانين الدنيا ثلاثة قانون الجذب.. الاستغناء.. السعي.
القانون الأول : قانون الجذب
انك تعلن بوضوح عن أحلامك بكل الطرق التمني.. الدعاء.. الكتابة.
يعني مثلا اول كل سنة اكتب ورقة بكل أحلامك و علقها قصاد عينك زي ورقة الدايت اللي بتعلقها على الثلاجة عشان لو نسيت تفكرك.
انا عند ظن عبدي بي… دلوقتي انت طاقتك إيجابية و واضحة انت بتطلب بوضوح يعني بدل ما تقول يا رب متسبنيش لوحدي مش عايز ابقى وحيد و مريض و فقير ما تجرب تقول يا رب ارزقني الونس و الصحة و الرزق.
القانون الثاني : الاستغناء
اتعلم لما حاجة تتعبك تسيبها..
Let IT go.
لما تتعلم أن الايد اللي توجعك تقطعها.. هتتعلم تستغني عن التوقيت و التفاصيل؛ فكرة الاستغناء هي قوة هتشتغل لما تتأكد انك طلبت من ربنا بوضوح و متأكد أن ربنا هيختار لك التوقيت و الشكل سلمها لله و لا تعترض و لا تقبل.
كله هيتحقق في الوقت اللي هتكون فيه مستعد اكتر.
القانون الثالث : السعي
ازاي أحقق اللي طلبته؟
فكر في الخطوة اللي هتوصلك لهدفك.
أسعى يا عبد و انا أسعى معاك..
يعني باختصار قانون الجذب فكرة واضحة هتطلبها بصيغة إيجابية (الدعاء)؛ قانون الاستغناء الابتعاد عن شكل تحقيقها و توقيته (اتعلم التوكل)؛ قانون السعي أسعى يا عبد و انا أسعى معاك.
تغيير صفة واحدة كل يوم يعني بعد سنة هتتغير فيك ٣٦٥ صفة.
سلحفاة عرجاء أفضل من كثير من أرنب ميت… صحي حمادة الفرفوش و خليه يدفن النكد في الرملة و كل موقف و لا شخص و لا حاجة بتشدك للزعل اديها لحمادة يدفنها في الرملة.
