سمر صلاح تكتب: أعدليها أنتى

دسمان نيوز – بقلم : سمر صلاح

هى الكفة مالت و الموازين اتقلبت .. ما تعدليها أنتى ؟

حسابات الدنيا اختلفت و الضغط بيزيد و المطالب بتبقى أكتر أصبحنا طول الوقت فى مقارنات ، صور موديلز الانستجرام اللى خاربة بيوتنا و محسسانا اننا لازم نبقى

Super Perfect

طفلة لا تتعدى ال 15 سنة و تشوف صورها و لا اجدع نجمة و دى كل انجازاتها .. لازم ابقى شاطرة و شيك زى الموديل دى ، لازم وزنى يبقى بالمسطرة عشان افضل واثقة فى نفسى لازم بشرتى تبقى صافية و شعرى مفيهوش غلط لازم حجابى يبقى زى البلوجرز عشان محدش يقول حاجة .. لازم لازم لازم مقاييس احنا بس اللى حددناها و بقينا نحدد أهدافنا على أساس الناس بتحدد الحلوة و الناجحة و الشاطرة على ازاى مبقاش الشطارة بالنجاح فى شغلك و لا فى دراستك و لا حتى فى انك قادر تساعد الناس ، تقدرى دلوقتى تبقى ناجحة وشاطرة و مشهورة بمجرد ما تعملى فيديو 3 دقائق و انتى لابسة أفخم البراندات و عاملة لك كام اعلان تحت الفيديو و تقولى لك كلمتين من بتوع اتقلى عليه و متتدلقيش و بطلى تعملى له أكل و

Don’t be available for Him

 و تلاقى عدد لا بأس به من المتابعين داخلين يسألوكى يتصرفوا ازاى طبعا كل الاحترام و التقدير لاى حد بيقدم محتوى عليه القيمة بس متغيروش الثوابت متقنعنيش انى هكون أحلى و أجمل لما اخس 20 كيلو وألبس براندات و انا عقلى فاضى ، شكلى وجسمى مفيهمش غلطة بس تقعد تتكلم معايا تلاقينى فلة معنديش فكرة عن أى حاجة غير أنى لازم ابقى كدة و تسألنى فى اى حاجة معرفش أرد عليك الحياة أبسط من كدة بكتير اتفرجى و اتبسطى و اعرفى الجديد و الدنيا بيدور فيها ايه بس متعتبريش ان دة ال

Reference

مش دة المقياس اللى هترسمى عليه انتى تقدرى تعدلى الموازين لو اتقلبت تقدرى متهزريش لحد ما تفقدي هيبتك. . أيوه متستغربيش الست لازم يكون ليها هيبة مش اي حد يتجرأ على الهزار معاها .. ولا كل أشكال الهزار تقبله .. وعلى فكرة ده لازم يكون وسط الجنسين مش علشان انتي في قعدة ستات يبقى مافيش حدود.

متتكلميش لحد ما اللي قدامك يصدع من تفاصيل كلامك ويشوفها مملة .. خلي كلامك محدد وعزيز زي فاكهة موسمية تروح لها النفس لما تغيب .. ابتعدي عن اللك الغير هادف وخلي كلامك مختصر وفي شكل نقاط مركزة .. مش عيب انك متعرفيش حاجات كتير مش مطلوب منك تكوني بنك معلومات .. بس لو اتكلمتي لازم تعرفي الكافي عن الموضوع اللي بتتكلمي فيه .. مش عيب تقولي معرفش .. بس العيب انك تكوني ساذجة.

متحشريش نفسك في تفاصيل حياة غيرك .. سيبي الحرية للي قدامك انه يقولك اللي هو أو هي عاوزين يقولوه عن نفسهم. . كتير من الأسئلة زي عندك اولاد أو انتي مخطوبة أو بتشتغل ايه اللي تبدو ليكي عادية ممكن تبدو إجاباتها محرجة لغيرك .. مش لازم تتعوجي في قعدتك عشان تبقى رقيقة و ستايل و محصلتيش .. الست ابتسامة .. مش اكتر من ابتسامة .. ولو حكمت يبقى ضحكة صوتها ميعديش ودانك لكن ضحك المعلمين ده وضرب ايدي على ايد اللي جانبي مع الالش ده اختراع ذكوري بحت انتى مش على القهوة ، مش مهم ابدا تكوني لابسه سنييه أو لبس غالي .. كفاية تكوني بسيطة وريحتك حلوه ووشك صافي ومتجانس ومختاره اكسسوارات مناسبة لوقت خروجك وافتكري أن اصعب انواع الأناقة ابسطها .. اوعي تتكلمي عن نفسك إلا إذا أطلب منك ده بسؤال مباشر .. لا تعليمك ولا ثقافتك ولا عيلتك ولا محلات الشوبنج بتاعتك تهم حد الا لو سأل عنها .. وياريت الإجابات تكون نبذة مختصرة لو بتحاولى تزودى ثقتك فى نفسك كدة تبقى غلطانة هتتقلب للعكس هتتهزى أكتر .. خليكى  لطيفة متتفهيش رأي حد ولا تغلطي حد الا في إطار ذوق ومجامل بلاش جملة الكلام ده غلط .. ممكن جدا تستبدليها مثلا أن الكلام غير دقيق .. الفرق كبير بين انك صريحة وانك قليلة الذوق .

عشان تعدلى الكفة و الموازين اللى اتقلبت كوني انتي ..

انتي اللي اشتغلتي عليها وطورتيها و ثقفتيها وعلمتيها. . محدش فينا بيتولد كامل لكن كلنا بنتولد قابلين للتغيير. 

ترك الرد

من فضلك ادخل تعليقك
من فضلك ادخل اسمك هنا