سمر صلاح تكتب : بعد الثلاثين

دسمان نيوز – بقلم : سمر صلاح

شوف مبدئيا كدة انت هيبقى عندك 25 سنة هتدخل تعمل نسكافيه و تطلع هتلاقى نفسك هوب بقيت 30.

هتدخل برجلك اليمين هتلاقى جوة مفاجأت ..

فوق الثلاثين يعنى بعد ما هتكون حبيت و كرهت و سبت و اتسابت و صاحبت و قاطعت بعد ما هتكون عيطت بحرقة و ضحكت بهستيريا بعد ما اتنصفت و اتظلمت بعد ما اخترت صح و لبست فى الحيط بعد ما هتكون سندت فى أفراح و مشيت فى جنازات بعد ما وقفت فى مستشفيات و اتعلمت تسد بعد ما صبرت و دوست على قلبك و مشيت و بعد ما اتعلمت تقول لأ بعد ما فضفضت و بعد ما كتمت.

بعد ما هتجرب كل حاجة و عكسها هتكتشف فى الاخر أن السعادة فى البساطة و الحاجات الصغيرة فى النوم بدرى و الضحكة و الهدوء.. فى هوا الصبح و صوت الراديو فى الخروجات العادية مع الناس العادية اللى شبهك مش ال

 . Fake

اللى هتحس معاهم انك عادى و خفيف و حر مش مضطر تذوق الكلام و لا تعمل شو عشان تبقى أجمد واحد طول الوقت .

بعد الثلاثين هتلاقى انك بطلت تنبهر بالناس و بطلت تحاول تبهر الناس ، هتتصالح جدا مع فكرة انك شخص عادى و صاحب عادى و أخ عادى و زميل عادى مش لازم تكون الاحلى و الاشيك و الانجح و انك مش داخل الاولمبياد فى مسابقة اجمد واحد فى المجرة.

بعد الثلاثين هتعرف انه يخرب بيت اللى يزعلك و يالا مع السلامة و هتقولها و انت مقتنع بيها وواخد نفس عميق و مع كل حاجة ربنا اختار لك انها متكملش هتبقى مؤمن بأن “قدر الله و ماشاء فعل” .

هتغير طريقة أكلك و لبسك و خروجاتك و أصحابك و هتلعب رياضة و هتسمع أغانى و تتفرج على أفلام و تقرأ و تخرج لوحدك و تسافر لوحدك هتاكل اللى يعجبك و تلبس اللى يعجبك و هتحب اللى يعجبك و طظ فى الناس هتقرأ و هتحب القراءة حتى لو مالكش فيها و هتغرق فى الروايات و هتعيش جواها .. هتتأكد أن الصاحب ساحب و أن الشدة بتغربل و اللى هيكملوا معاك بعدها قليلين و هتكتشف ان الصحاب سند مش خروجة و كام صورة .

هتحاوط نفسك بناس لطيفة و هتشترى دماغك و اللى بيضايقك بلاش منه أصلها مش طالبة نكد .. هتقرر تبعد أن البؤساء و النكديين اللى تحكى له مشكلة فيعلى عليك و يقولك انه بائس و محبط أكتر منك عشان ياخد المركز الاول فى البؤس و يقابل الوحش فى النهائى .. هتبعد عن الناس اللى بتدور على النكد بمنكاش و هواة النفسنة و حرقة الدم و هتدور كويس لحد ما تلاقى ناس سالكة و هتبعد عن اللى دورهم فى حياتك انتقاد و بس بتوع ” احنا خايفين عليك و عارفين مصلحتك اكتر منك” انت اصلا عشت 30 سنة فأكيد دة معناه عشت و قابلت فى الدنيا اللى يخليك تبقى عارف مصلحتك .

أهم حاجة هتوصلها انك هتبدأ تفهم العقد و الكلاكيع و ترفض تبقى جزء منها .. مش هتسمح لحد يطلع عقده عليك و لا تدفع ثمن غلطات مش بتاعتك .. هتبعد عن الكذاب اللى هيفضل يلزق لك تهمة الكدب فى كل وقت هيكدبك حتى لو قلت له صباح الخير انت كداب ، الفاشل اللى هيلزق لك فشله طول الوقت أحسن تنجح و تسيبه ما هو مش هيفشل لوحده هتقدر تحدد بوصلتك و تعرف اللى ينفع معاك و ايه اللى لا .. ايه اللى مقبول و ايه اللى مرفوض .

الاهم و الاهم من كل اللى فات .. أنك تبقى عارف أنك مكبرتش و لا عجزت و لا المفروض تبقى الراسى الحيزبون .. كلنا جوانا قلوب أطفال لسة عاوزة تلعب و تجرى و تحب و تتحب و تدور على اللى بتحبه عشان تعمله ، متفنيش نفسك فى حاجة معينة و لا حد و لا شغل و لا بيت و تفتكر انها راحت عليك و مش قاتدر اخرج و لا أسافر اصل العضمة كبرت متسيبش نفسك جعانة لاى شىء طالما مشروع و تقدر تحققه .. كله بالعقل.

بعد الثلاثين أنت فى مرحلة “أنا بطل حياتى”.

ترك الرد

من فضلك ادخل تعليقك
من فضلك ادخل اسمك هنا