سمر صلاح تكتب : ادبح القطة

دسمان نيوز – بقلم – سمر صلاح

اكسر لها ضلع يطلع لها 24 .. لازم تكسر دماغها كدة من الاول عشان تكسر دماغك ان شاء الله

طبعا انا لا بقول البنت زى الولد و لا الست زى الراجل لان اصلا ربنا بيقول “وليس الذكر كالانثى” فأنا مش هخرف بس هى مش حرب انا بشوف كم فيديوهات و مناشدات و محاولات تتصرفى معاه ازاى لما يزعق لك لما يضربك اضربيه و مرار طافح كدة و هو يعمل قعدة على القهوة كدة يحكى لاصحابه اد ايه هى عنيدة فيقولوا اكسر دماغها دى هتتعبك .

بص يا سيدى مبدئيا كدة لو البنت اللى معاك شخصيتها قوية متحاولش تكسرها بالعند و الخناق و الخصام و التسلط عشان تحس انك كدة اللى مسيطر يا عم حبها و هى هتسمع الكلام و هى مبسوطة .

كل ست مهما كانت دماغ و شخصية وايجو ورأى و استقلالية وووو عاوزة فى الاخر واحد تسيب كل الهيلمان دة على بابه و تطلع كل حاجة حلوة معاه تطلع الطفلة والحبيبة و الأم و الصاحبة و المنحرفة و روقة اللى فيلم العار بمنتهى السهولة و الحب دى فطرتها أساسا و انت كل ما هتكبرها و تساعدها تكبر هتساعدك و هتكبرك معاها مش عشان هى ضعيفة و خايفة و مش عارفة تعرف حاجة من غير غيرك هى كفاءة توصل لوحدها لكن هى دى القوة الحقيقية انها تاخد قوتها منك قوتها يا سيدى مش كسر دماغها وقلبها.

الانسان عموما مش الست بس قوته عمرها ما بتكون فى الايجو العالى اللى عنده فى علم نفس بيقولوا ان الايجو بتاع البنى ادم بيظهر لما بيكون حاسس بعدم أمان اما يحس انه مسنود على حيطة مايلة و خايف يسيب ايده للشخص دة الانسان بيحتاج على الاقل شخص واحد فى حياته يبقى على طبيعته ادامه يبين له ضعفه و حبه و مشاعره و احتياجه الشاطر اللى يعرف يحلها لكن هتحاول طول الوقت تكسرها هتعند و تحاول تثبت لك اد ايه هى قوية و حادة وعنيفة الحاجات اللى بتضايقك انت كراجل و تدخلوا فى دايرة كبيرة من العند و تنشيف الدماغ .

فى مناقشة سريعة كدة على الموضوع دة سألت سؤال واضح و صريح حضرتك ليه دايما بتقول لها انتى اساسا مبتعرفيش تلبسى رغم انها بتلبس حلو ؟ بقولك ايه متتكلميش عشان بتقولى اى كلام ؟ قال لى بصى هى كدة كدة بتحبنى انا مش عاوز اهدها و انا هعمل كدة ليه انا بس بقول لها الحقيقة بس هى بتحبنى !!

طيب حضرتك عارف ان الحب مش سبب كافى انها تكمل و تستحملك و عارف برضوا ان بوست واحد فى جروبات البنات هتاخد رأينا فيه ان حضرتك بتكسرها و تهدمها هنقنعها انها اجمل مخلوق فى الدنيا و هتقفل معانا و هتقولك امشى يالا من هنا البنات دلوقتى بقت عارفة ان دايما فى حل غير انها تسكت عشان المركب تمشى البنات دلوقتى ممكن تغرقك انت و المركب لو حاولت تقلل منها .

حتى فى علاقاتك مع اصحابك اللى يشدك لتحت و يحاول يكسرك بلاش منه ..

متعتمدش ان حد بيحبك فتكسره عشان تحس بنفسك عليه الحب مش سبب كافى لاى حاجة يا فرحتى و انت بتحبنى بس مش فاهمنى بتحبنى بس بتقول لى ان انا فاشلة فى كل حاجة يعنى انا عشان بحبك تقرفنى فى عيشتى ؟؟

التفاهم اهم التشجيع أهم الامان اهم الثقة أهم .. المشاركة أهم من الامتلاك انك تشجعنى أهم من انك تفضل تحبطنى دة ليا و ليك على فكرة انك توفر حياة هادية تخلينى اشطر و احسن بدل ما ابقى عارفة انى اول ما اقع انت اول واحد هتقول لى ما انا قلت لك مش هتعرفى ياما ناس كتير فى حياتنا خسرناها و بطلنا نتكلم معاهم عشان مبقوش مديينا الامان اننا نحكى لهم .

يعنى من النهاردة لما صاحبك يقولك هى شايفة نفسها عليك ليه كدة ابقى اقول له عشان هى ست البنات و لما يقولك دى مستقوية استقوى عليها و اكسرها ابقى اكسر له دماغه و ابقى عرفه على جورجينا مرات كريستيانو رونالدو .

متخافش انك تكون مع ست قوية عشان غالبا هتكون هى “جيشك الوحيد” ازرع تلاقى ..

ترك الرد

من فضلك ادخل تعليقك
من فضلك ادخل اسمك هنا