سمر صلاح تكتب : مروا خفافا

دسمان نيوز – بقلم: سمر صلاح.. كاتبة مصرية

هو احنا فترات فى حياة بعض و لا كلنا بنبقى ناويين نكمل ؟ يعنى لما بتقول لصاحبك انه صاحبك الوحيد على الكوكب و انه أهم حد فى حياتك بتبقى قاصد دة فعلا و لا بتبالغ كنوع من أنواع المجاملة ؟ طيب لما بتقول بحبك بتبقى قاصدها فعلا و لا بتقولها و بظروفها بقى بعدين يحلها ربنا هنبقى نشوف ؟ يعنى هو انت بتمنح ألقاب مستحقة و لا بتوزع و بعدين نبقى نشوف مين اللى اللقب دة جه على مقاسه و مين كبير عليه ؟ 

الحقيقة أن انا من الناس اللى بتقدس العلاقات الأنسانية بجميع مسمياتها قرابة ، صداقة ، حب ، كل صدفة جمعتنا بحد و كانت سبب اننا نعرفه بحب الناس اللى بتوزع حب و حنية و اهتمام و احتواء ، الناس اللى بتتشعبط فى أمل عشان يفضلوا مكملين مع بعض اللى بتحاول ألف مرة قبل ما تقفل الباب الناس اللى بتحاول بكل طاقتها قبل ما تقول أنه مفيش فايدة والناس اللى وقت الخلاف بتسيب باب للرجوع لعل و عسى ! يمكن دة مبدأ متعب أحيانا و استهلاك للروح بس الموضوع يستاهل أه يستاهل لما تكون عارف تفرق بين أمل المحاولة ووهم البقاء.

على العكس تماما ..الناس اللى بتظهر و تدمر اللى بتهد و تخرب اللى بيدخل بمنتهى السلاسة و البساطة اللى فى الدنيا يشقلب حياتك يخليك تشوف الدنيا كلها ورد ملون و الحياة بقى لونها بمبى يفصل حياتك على مقاسه بالظبط و ياخد من وقتك و منك اللى هو محتاجه بالمسطرة حب يمكن ، أهتمام ماشى تشجيع ممكن سيطرة و حب امتلاك شغال يعتبرك حق مكتسب و يرسم لك قواعد و خطوط تمشى عليها و انت مبسوط و متيم مسلم كدة و مش بتسأل أنا رايح على فين لأن الموضوع يبدو حلو و فجأة هووووووووووووووووووب هو قرر يمشى .

خلينا نفترض حسن النية فى الطرف الأخر يمكن كان قصده خير و كان بيحاول زيك و مقدرش و يمكن كان بيجرب و ماله يجرب فيك يمكن أنت كنت بالنسبة له مرحلة أو فترة نقاهة بين حدوتة حب قديمة و حدوتة جديدة و يمكن أنت اللى اتصرفت غلط فأضطر يمشى يمكن أنت معرفتش تتفصل على مقاسه فقال مش لاعب 

مش هكمل. Game Over

أنت بقى مين فيهم اللى بيجرب و لا حقل التجارب ؟ اللى بيمسك و لا اللى بيسيب ؟

الحقيقة أن انا مش قادرة أقدم النصيحة لشخص متساب حد موجوع من فكرة العشم اللى طلع على مفيش ؟ حد حط أحلامه و رسم حياته الجاية كلها على شخص قرر فجأة انه يمشى أصل مهما قلت له انسى و ابقى كويس مش هيعرف يدوس على الزرار سيبه يعدى بكل المراحل يزعل و ياخد وقته و يتعايش مع الوجع لحد ما ييجى يقولك انا خفيت كنت بحبه و مبقتش و بكره يلاقى اللى يعوضه.

لكن لو أنت صاحب قرار انك تقرب و بعدين تمشى تعالى أقولك .. ممكن حضرتك تفكر لحظة ثوانى بس قبل ما تتصرف قبل ما تقرب قبل ما تقتحم حياة حد هيفصل حياته كلها على مقاسك و أنت مش مقرر إذا كان هو دة و لا لا ؟؟ ينفع تقول له بالظبط هو يبقى لك ايه بدل ما يفضل يرسم حاجات و توقعات فى دماغه و هى مش صح ؟ طيب بلاش ينفع تحط نفسك مكانه !! أنا مقدرش أقولك قرب أو أبعد بس لو قربت متبعدش ، لو هتوعد لازم تبقى مقرر أنك مش هتخلف الوعد دة بإرادتك أبدا ، لو اهتميت و سألت كل يوم متختفيش بعدها يا تهتم على طول يا تخليك على الحياد لكن متعودش حد على اهتمامك و بعدين تمشى ، أوعى تعشم حد بس لو عشمته متكسروش .

محدش هيفرض عليك الحب أنت حر بس قبل ما توعد يعنى نتأكد الاول و بعدين نقول مش نقول و بعدين نفكر !! 

يا تخليك أد كلامك يا تخلى كلامك على أدك .. 

مفيش حد قليل على أنه يتحب و مفيش حد ميستاهلش انه يحب و يتحب و يحلم و تغير خططك عشانه.. زى ما مفيش حد ليه الحق انه يتسبب لحد تانى فى وجع وألم وكسرة .. قدر اللى يبقى بسيط معاك و فرق بين انه بسيط و انه قليل احترم بساطته بدل ما تستقل بيه و تبعتر حقه يمين و شمال .

اوعى فى يوم تقعد مع نفسك و تبرر أذيتك لقلب حد و تقول أنا على فكرة كنت بحبه أو كنت فاكر انى هحبه لا الحب و الأذية مبيجتمعوش فى قلب واحد أبدا .. فكر بس فى النغزة اللى هتبقى فى قلبه كل ما هيفتكرك فكر فى كل الندوب اللى اتسببت له فيها لحد ما شوهت كل حاجة جميلة كانت فى قلبه و فكر قبل ما تاخد حب و عشم مش هيعرف يديهم للى يستاهلهم بعدك .

مروا خفافا فإن لم تنفعوا فلا تضروا.

ترك الرد

من فضلك ادخل تعليقك
من فضلك ادخل اسمك هنا