سمر صلاح.. تكتب : هاتعدى

دسمان نيوز – سمر صلاح

قرار انك متكملش فى علاقة سواء بأختيارك أو بقرار من الطرف الثانى مش سهل و لكن ..

هو احنا بنخاف من النهاية أد ما بنخاف من اللى بعدها ؟ يعنى خايف عشان هيوحشك و لا خايف من ذكرى ممكن توجعك لما تفتكره؟

من محاولة انك بتحاول و بتفشل .. انك تحاول تعدى و تمشى و تنسى و متعرفش .. خايف تسأل نفسك اسئلة كتير مالهاش اجابات بعد ما يمشى ؟؟ زعلان و خايف على حاجات حصلت معاه و حاجات كان نفسك تحصل !

بتخاف من احساس الهزيمة و الاحتياج و انت عارف انه مبقاش ينفع ؟

هترهقك احاسيس الحنين اكثر ما هيرهقك بقايا وجوده ..

هتوجعك فكرة خيانة الوعود بعد ما كان كلامه قادر يخليك تمشى بثقة .. بقلب جامد و مش شايل هم كلها افكار بتخوف و بتهز و لكن..

مش أخر الدنيا

مع الاعتذار عن قسوة التشبيه و لكن اللى أبنها بيموت بتعرف تعيش بعده هتوقف انت حياتك و دنيتك على علاقة مكملتش .. على حدونة مهما كانت حلوة مش هتكمل ؟

موافقة جدا ان الموضوع مش سهل بداية من التفكير فى القرار و حتى لحظات تنفيذه و انت بتقدم رجل و تأخر الثانية عشان لو لقيت طرف حبل يخليك تكمل تمسك فيه زى الإدمان بالظبط حاجة انت عارف انها بتأذيك بس مكتفى بالسعادة المؤقتة اللى بتاخدها منها .

فى كاتبة أمريكية أسمها “هيدز بولو” عملت دراسة عن التعافى من العلاقات و حددت كلامها عن العلاقات العاطفية تحديدا و بعد بحث و اسئلة و تجارب توصلت ان كل انسان قادر على تخطى أى فقد فى حالة إذا هو بنفسه أراد التخطى .. بمعنى أن كل شخص هيقدر يعدى فترة ما بعد الفقد لو هو صمم و قرر دة ولكن أكدت انه مش سهل بس مش مستحيل و حددت  6 خطوات تقدر تساعد أى شخص أنه يتعافى من اى علاقة خاصة لو كان هو الطرف اللى مسه الأذى الأكبر و قالت الخطوات دى :

1-انك تقبل مشاعرك السلبية :

بمعنى انك لازم تعترف بزعلك لانك لو دفنت مشاعر فى وقت لازم تطلع فيه فى الغالب هتنتكس بعدها لانك مثلت مشاعر غير اللى انت حاسسها عشان كدة لازم تاخد وقتك و تعترف بمشاعرك و اكتئابك.

2-ساعد نفسك:

ارجع دور على الحاجات اللى كانت بتسعدك وبعدت عنها لانك كنت مكتفى بوجوده و قافل دنيتك عليه و حاوط نفسك بناس ايجابية تقدر تساعدك انك تعدى .. اكيد بقى عندك وقت دلوقتى تتعلم حاجات جديدة.

3-أوقف كل اشكال الاتصال.

4-توقع المزيد من الدراما:

لازم تكون متوقع ظهوره فى أى لحظة كمحاولة لاختراق فترة تعافيك .. لازم تكون مستعد للحظة دى .

5-نفس عن مشاعرك:

فى لحظة ما هتحس انك محتاج تقول له و تواجهه بكل حاجة هو عملها امسك ورقة و قلم و اكتب له رسالة بكل حاجة جواك ، خلصت ؟ قطعها و ارميها من غير ما تبعتها له .

6-لا تتسامح مع ذلك مرة أخرى :

من المؤكد أنك اخطأت و لكن أوعد نفسك انك مش هتكرر الغلطة دى تانى عشان تكون قادر تبنى علاقات جديدة .

الخطوات دى ممكن تساعدك تعدى .. انت كدة كدة هتعدى بس هى محاولة انك تعدى بسلام .

مش سهلة و كلنا متفقين .. هتقع فى النص اكيد بس خليك متأكد انك هتقوم زى الليل و النهار بعد ضلمة الليل الشمس هتطلع بس محتاج وقت ..الوقت كافى و قادر جدا انه يعدى بيك و اتعلم تقول لا لما تكون لازم تتقال و خليك دايما فاكر :

“انعدام الرغبة امام شىء ادمنته ..إنتصار”

ترك الرد

من فضلك ادخل تعليقك
من فضلك ادخل اسمك هنا