سمر صلاح تكتب : احنا أسفين

دسمان نيوز – سمر صلاح – كاتبة مصرية

صباح الخير… احنا اسفين

لكل اللى خذلناهم بدون قصد اللى كانوا مستنيين مننا كلمة معينة و مقولناهاش ، لكل اللى قالوا كلمة فى وسط كلامهم عشان يلفتوا نظرنا و مفهمناش ، للى كانوا مستنيين مننا تشجيع و اللى كانوا محتاجين رأينا .. اللى طلبوا مننا ننقذهم و معرفناش فأضطرينا نسيبهم غرقانين لحد ما وصلوا على البر لوحدهم ، اللى كنا بالنسبة لهم خيبة أمل و اللى خيبنا ظنهم فينا للى حسسناهم أنهم وحشين بسبب كلمة قلناها أو هزار سخيف و احنا مش فاهمين تأثيره هيكون ايه .

احنا اسفين … لكل اللى كانوا على وشك يقولوا حاجة مهمة واحنا مدناش الفرصة للى بعتوا لنا اشارات كتير معرفناش نستقبلها للى سلموا علينا بحرارة و احنا ردينا ببرود .. للى حاولوا يضحكونا فى عز الوجع و مضحكناش و اللى استنوا يشوفوا الحماس فى عنينا لما يقولوا لنا خبر معين و مشافوهاش .. للى جريوا علينا يفضفضوا عشان نشيل معاهم الحمل و قولنا لهم “معلش” .

لكل اللى إذيناهم أحنا أسفين .

إلى من خذلونا … أنت لا تعلم كم كنت احتاجت ، عليك أن تعلم ثم توقن ان اقسى مراحل الاحتياج و اشدها وجعا هى الخذلان .. هزيمة ساحقة و صفعة قوية ليس من السهل على أقوى قلب فى العالم أن يعبرها .. الاحتياج أشد انواع “التعرى” فلا تتعرى الا لمن يستر ..

إلى كل من وعد واخلف ..لقد اقترفت خطأ كبير .

سألتها : يعنى انتى كنتى مبقتيش تحبيه ..طب ازاى ؟

جاوبت : تقريبا كدة مبقتش احبه اصله خذلنى كتير علاقتى بيه عمر ما كان فيها أمان او انه يتعلم ميسيبنيش بسهولة كنت بعمل مجهود كبير عشان نكمل عشان ميمشيش كنت دايما ببقى مركزة فى كلامى و تصرفاتى عشان اخد بالى انى مقولش حاجة تزعله كنت باخد بالى دايما و انا بتكلم مع الناس عشان بخاف من رد فعله ..كل كلمة بقولها حتى لو بهزار هتخبط فى خناقة ..كانت فترة حب مش حرب .

كلنا نفس الشخصين .اللى خذل و اللى اتخذل احتاجنا ناس قصروا معانا و ناس احتاجتنا قصرنا معاهم عشان كدة احنا اسفين للى خذلناهم و قابلين اعتذار اللى خذلونا بس افتكر دايما انك ممكن تكون بالنسبة لشخص تانى الكلمة اللى تقدر تعمر الخراب اللى فى قلبه متبخلش بيها لو تقدر .

أهم ما فى العلاقات الانسانية بصرف النظر عن مسمياتها هى الامان ، السند انك تنام و انت واثق ان اللى بتحبه دة عمره ما هيجرحك و لا يخيب أملك و لا تندم انك اخترته هو دونا عن باقى الكوكب ما هو اصل مفيش حد فى الدنيا هيعرف يشيل الهم لوحده لازم يبقى معاه حد يسند عليه ياخد بايده … وقت ما يحتاجه يلاقيه.

ترك الرد

من فضلك ادخل تعليقك
من فضلك ادخل اسمك هنا