سمر صلاح تكتب : أنا بنسحب

دسمان نيوز – بقلم : سمر صلاح

هو دايما بيكون الإنسحاب هزيمة ؟ يعنى فكرة انك خلاص مش قادر تكمل فتسيب كل حاجة و تمشى هروب ؟ هزيمة ؟ وصلت لقمة العجز وخلاص مش قادر فقررت تنسحب ؟

 الانسحاب بيكون هزيمة لما تكون قادر تكمل وتختار الحل الأسهل أن يكون لسة فى أمل و انت محاولتش تمسك فيه و دة غالبا الاختيار اللى هتندم بعده و فى وقت هتقول لنفسك انا ندمان يا ريتنى حاولت تانى كان ممكن أكمل .

فى وقت تانى منتهى الشجاعة انك تمشى عشان الشجاعة مش فى انك تكمل فى شىء مالوش اخر بالعكس الانسحاب منتهى القوة من حاجة مالهاش اخر مالهاش حل انت عملت اللى عليك و اللى معاك عملوا اللى عليهم و انت وهما زى الفل بس مفيش حل .. الانسحاب شجاعة من حاجة بتديها اكبر من حجمها و فى المقابل بتاخد أقل مما تستحق فى شغلك فى علاقاتك فى صداقاتك فى حياتك عموما فى اى حاجة ليها طرف تانى غيرك فى الحالة دى لو كملت انت بتاكل من روحك  وكل الحماس تجاه الحاجة دى هيتحول لهم .. هم كبير على قلبك و عقلك لا انت سعيد و لا عندكالقوة اللى تخليك تنسحب .

بس امتى تعرف انه دة وقت الانسحاب ؟ امتى اللحظة المناسبة ؟ امتى تبدأ تسأل نفسك و تستنى اشارة تقول لك تفضل و تكمل و لاتبعد و تمشى ؟ امتى تنسحب و امتى تسيب الباب موارب ؟

فى صفحة من صفحات المشاكل على السوشيال ميديا بنت بتسأل وهى حاسة انها مظلومة .. أنا عملت كل حاجة عشان يحبنى و محبنيش نفسى أعرف ايه اللى كان ناقصنى عشان يشوفنى ؟ عشان يحس بيا انا وحشة فى ايه ؟

الصراحة انتى وحشة فى تفكيرك .. انك بتحاسبيه على مشاعرك مين قال انك مطالبة تعملى حاجة عشان حد يحبك ؟ هيحبك عرفان بالجميل مثلا انك حبتيه ؟

العلاقة اللى هتعمل فيها مجهود عشان حد يحبك هى علاقة مش سوية خاصة لو الطرف التانى واضح و صريح ومعترف انه مش مهتم .. مش بس انه مبيعملش نفس المجهود اللى انت بتعمله ! غصب عنى مكنتش متعاطفة معاها اومعتبراها مظلومة او ضحية .

أنا معاك فى انك تعمل كل حاجة عشان بتحب ..حب من قلبك وادى كل طاقتك و هات اخرك بس مش عشان الطرف التانى يحبك اوعشان تيجى فى وقت تقوله انا بحبك فلازم انت تحبنى .. لو هتعمل عشان يحبك و انت عارف انه مش مهتم هتستنزف طاقتك وتفضل طول الوقت مستنى مقابل عشان لازم تبقى عارف ومتأكد ان الحب محدش بيشتريه حتى لو بالحب هو بذرة يا تكون موجودة و تسقيها فتكبر يا تكون مالهاش وجود من اول فمهما رويتها مش هتحصد حاجة.

أنا من مؤيدى فكرة انك تحارب لاخر نفس عشان اللى انت عاوزة طول ما انت قادر تحاول متقصرش عشان يوم ما يضيع متندمش و تقول ان كان فى ايدك حل ومعملتوش.

مش بس فى الحب حارب عشان كل حاجة عشان شغل حلمت بيه عشان اصحابك عشان أهلك .. الصحاب ممكن يكونوا نادرين بس موجودين سيبك من كلام اننا فترات فى حياة بعض وجمل السوشيال ميديا اللى هتحولنا لالات اى حاجة انت عاوز تكمل فيها هتكمل بس استنى …

لحد ماتحس ان وجودك بيأذيك و يأذيهم و مش عارفين تتجنبوا الأذية دى أول ما تحس انك بقيت تقيل على حد مهما كنت بتحبه امشى .. لما ت حسانه مش بيبادلك نفس الحب والتقدير مش معناها انه وحش هو باب القلب دة بتاع ربنا محدش هيحبك غصب عنه ولا عشان انت حبيته .. خطوتين لورا كدة و زى الشاطر ألزم حدودك و احمى كرامتك و بكده هتحافظ         عليه وعلى نفسك و تبقى اتجنبت الاثار السلبية لأوهام العشم الزايد وأعراض سقف التوقعات العالية وتشيله ذنب خيبة أملك فيه   ..حاولت مرة اتنين تلاتة شكرا و دة اسمه الانسحاب الامن لا ضرر و لا ضرار و لاانت و لا هووحشين .

واوعى تكره حد او تخسره لمجرد انه مش بيبادلك نفس شعورك متحاسبش حد على مشاعرك انت .. على احلامك انت وعلى خططك انت حب بس من غير ما تطلب منه يحبك فى المقابل حب  بس و انت عارف ان حبك ليه مش معناه اى مسئولية تجاهك انه يبادلك نفس المشاعر .

انسحابك هيكون منتهى القوة لما يكون انسحاب امن .

ترك الرد

من فضلك ادخل تعليقك
من فضلك ادخل اسمك هنا