ماتتجوزوش .. بقلم : سمر صلاح

دسمان نيوز – بقلم : سمر صلاح – كاتبة مصرية

اه و الله زى ما بقولك كدة فى حاجات معينة كدة لما تلاقى نفسك بتفكر تتجوزعشانها  وبس  يبقى متتجوزش  .

يعنى متتجوزش و انت شايف الست كائن اقل منك أو انقص منك و اقل حكمة و متتجوزش و انت بتفكر انك تلحق تخلف اولاد قبل ما سنك يكبر متتجوزش يا شهريار و انت فاكر انك هتسمع حدوتة كل يوم ولا تتجوز الجدارية اللى هتشتغل و انت نايم على ريش نعام و لا تتجوز فلانة عشان عجباك و خسارة تضيع منك وشوية و تحس انك اتخطفت بدرى  وانك معشتش شبابك و عجزت بدرى .

ماتتجوزش عشان ابوك وامك قالوا لك اتجوز و ل ا عشان تكمل نص دينك انت كملت النص التانى ؟ متتجوزش و انت عندك تحفظات او ملاحظات على اللى هتتجوزها  و تقول هى هتتغير بعد الجواز وبعد كدة تبدأ تتخيل انك هتربيها على ايدك و تفصلها على مزاجك متتجوزش اللى بتشتغل و تقولها سيبى شغلك و متتجوزش اللى مش محجبة و تفرض عليها الحجاب .

و انتى كمان متتجوزيش لمجرد انك عاوزة تلبسى فستان الفرح ولا عشان اللى فى سنك اتجوزوا بصرف النظر عن الشخص اللى هتتجوزيه و تتفاجئى باللى جوة بعد كدة.

ماتتجوزيش لمجرد انك تطلعى من بيت اهلك وتحسى بحريتك و تشمى نفسك اختارى بس الاول انتى رايحة فين ومع مين.

متتجوزيش عشان كل اصحابك اتجوزوا وشكلك هيبقى ادامهم ايه و نظرات الناس ليكى اللى هما غالبا بيضربوا نفسهم بالنار عشان اتجوزوا ناس غلط.

ماتتجوزيش عشان ماما و بابا بدأوا يقلقوا وقطر الجواز اللى بيفوت و المجتمع اللى مبيرحمش محدش فى دول هينفعك فى محكمة الاسرة ولا و انتى نايمة بتعيطى كل يوم نتيجة سوء اختيارك متتجوزيش و انتى فاهمة انه الامير يا  سندريلا المنقذ  ومحقق الاحلام هو بس رفيق فى الرحلة فاختارى صح .

اتجوزوا ..

لما قلبك و عقلك يتفقوا ان هو دة من غير ماتفكر هتغير فيه ايه .. اتجوزى لما تلاقى الاب و الحبيب و الزوج من غير ما  تحمليه    فو ق طاقته و تلبسيه دور مش  دوره و لما ميقدرش على الدور دة تتهميه بالتقصير و تطلعى عينه .

اتجوز لما تحبها و تشوفها بنتك و مراتك و امك فى خوفها عليك مش ام تتبناك مش خدامة  ومش مربية     لو عاوز شريكة حياة عنينا اتجوز اهلا و سهلا .

اقل من شريك حياة مينفعش عشان لما تقابل كوارث تلاقى اللى يشيل معاك تلاقى اللى يسندك اتجوزى اللى يخليكى مطمنة ومش خايفة و عارفة انك ساندة على جبل وانت اتجوز الست الجدعة  اللى يوم ما تدخل حرب تبقى هى جيشك الوحيد .

اتجوزوا .. بس لا تتجوز بعقلك ولا تحب بقرار .

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                          .

ترك الرد

من فضلك ادخل تعليقك
من فضلك ادخل اسمك هنا