درايش : هدايا.. بقلم : وضّاح

0
0

معْسر الوقت نِلْنا من إيدينه عطايا

قبل يرجع لطبعه حيث طبْعه ضنين

يوم شفتچ وفاضت في عيوني هدايا:

إلْتفاتچ، ونورچ، والكلام الرزين

آمنه الروح عندچ چِن كفّچ حنايا

ومنهو غيرچ حريصْ وللودايع أمين

من عرفتچ ونا اللي ما وَقَفْت لمرايا

أتمَنْظر بعينچ… وألقى إنّي أزين

يا صباح المباخر يا صباح القَرايا

من زرع في ضلوعي وردة الياسمين؟!

ومنهو لوّن وبدّل في عيوني الزوايا

ومنهو أحيا ورودٍ ذابله من سنين؟!

لو يوصّون قلبي ما استمَع للوصايا

منهو قال الحدايد ما تحن وتلين!

شفت ضارٍ شديدْ وقايدن له سرايا

عقب ذيك المعارك عندكم يستكين!

وشفت حُرٍ مجرَّب ما يهاب المنايا

مخلبه بالثنادي وناظره في العرين

حام وأرخى جناحه يوم دارت نوايا

وواهج الشوق حَدّه يم ذاك القطين

الجريدة

ترك الرد

Please enter your comment!
Please enter your name here