الفلوس تغير النفوس بـ قلم محمد خلف

0
0
الرجل : يا ناس منهو اللي يرحمنا من بعض تفاهات‫ اهل السوشل ميديا وخصوصا النساء منهم اللي ابلشونا بأعمارنا ؟.. معقولة كل تفاهة يعملونها يروّجون لها بأوساط المتابعين لهم !.. اللي البعض منهم اقل ماتقول عنهم سذج مع مرتبة الشرف !.. والله شي يزهق ويبط الجبد والطحال والمعاليق ايضا معقولة كل شي يروّجون له ؟.. ماعندهم للاسف كنترول ولا تحفظ على بعض المنتجات المروج لها كل هدفهم الربح المادي ومغثت خلق الله من اللي عندهم عقول للحين !.‬
‫الشايب : الا عقولهم على اربع شوارع يابوك !.. عقول خلق الله ماهي سيم سيم .‬
‫الشاب : عطو سداح فرصه يعبر عن مايجول في خاطه لان كسر الخواطر حرام و كثر الجفا ما يفيد .‬
‫الرجل : ومثال علي ما أقول هو ما قالته الليدي حرمنا لجنابي بان وحده من المشهورات عملت دعاية لمنتج ما للبشرة .. وعند اختلاف الطرفين على المبلغ المدفوع للدعاية !.. المعلنة ارجعت بكلامها بخصوص المنتج اللي كانت تمدحه ليل ونهار بانه منتج للاسف غير صالح وأنها حست بالذنب ولهذا حبت تنور ( المحكمة ) وهي تنفض شليلها وتبرأ الي الله منه !.‬
‫المعاق : لا حول ولا قوة الا بالله معقولة الجشع والطمع وصل بهذا الوضع عندنا ؟.‬
‫الخبير : امال ايه وحمدلله على السلامه ( اخيراً نطق ) وفعلا تصل متاخرا أفضل مليون مره من ان لا تصل ياحبيب والديك .. وحصل ايه باخرت الفيلم ده ؟.‬
‫الرجل : كل سحقا ومحقا لان راعية المنتج هي اللي تضررت !.. وصارت تمشي تكلم نفسها من الخسارة اللي تكبدتها أشكال وألوان هذا غير سب خلق الله لها بأنها كانت ناوية تغشهم والله فضحها اللي بها ما بها !.. هذا غير بعض المعلنات اللي تعلن عن حاجات مالها قيمة وبعد الإعلان صارت سلعه غالية الثمن بالشو وبالهرجة الامر اللي كبد الناس ديون لا طائل لها .. وبهذي المناسبة اشكر واحد من الدكاترة ( يقلون كان متين وضعف ورفع قضية على احد المطاعم المشهورة ) اللي متصدي للبعض منهم بالبرهان والحجة .‬
‫الشايب : السوشل ميديا لابد من مراقبتها من قبل الجهات المختصة لمتابعة هذي المهازل المستنزفة لجيوب المواطنين !.. بالعربي نحتاج ضمير حي ينقذ الناس من أضرار بعض السلع المروج لها حتى لا تقع الفاس بالراس ونقول ياليت اللي جرى ما كان !.. ومنا الي من يهمه الامر .‬
‫المتمولس : سوْال برئ هل تؤمنون بمقولة اذا أردت محو إعجابك بشخص تعرف عليه ؟.. وفي هذي الاثناء رفع على مسامعنا الشيخ زغلول اذان الظهر .‬
‫محمد خلف‬ – دسمان نيوز

ترك الرد

Please enter your comment!
Please enter your name here