محمد الشمري يتساءل ،، لماذا أصبحنا طوفة هبيطة ؟.

0
0
الظاهر انهم مش جايبينها البر أبد ؟.. قالها الرجل ثم أضاف يا جماعة الخير اشوف حكومة الفلبين ما بعيونها احد ؟.. حنا ما صدقنا خلصت مشكلة عمالتهم بالكويت !.. اشوف عادو الكره من جديد بعد تهديدهم بحظر إرسال عمالتهم لنا !.. والكلام هذا ماهو من بيت اهلي بل كلام وكالة الأنباء الفلبينية اللي بثت خبر تقول فيه ان « وزارة العمل تفكر في فرض حظر على إرسال الخدم إلى الكويت بعد وفاة ( طبيعي حسب التصريحات ) خادمة فلبينية هذا الأسبوع » .

المعاق : الظاهر موسم الحلب والموز بدا ؟.. يالربع الطبطبة والطيبة الزايدة لها حدود وهي تعطي للناس اللي يستحقونها ؟. ماهي لناس كل هدفها الحلب لآخر قطره هذي والله مصيبة !.. ومن ديوانا الموقر أطلب من الدولة بإرجاع هيبتها قبل لا ننحلب ( لله الحمد ضرعي صغير ) معها !.. واسال سوْال برئ حنا وش حادنا عليهم ؟.

الشاب : للاسف حنا محلوبين من قبل بالاسعار !.. لا بالله جنهم لقونا وان ما حطوا لهم حد راح ياكلونا اكل حبه حبه يا كلك اكل البرشومي ( هم هم هم ) !.. شنهو مسرع نسو ربعنا فعايل سفارتهم فينا ( إعلانها تهريب الخادمات من منازل مخدوميه ) ؟.. معقولة احد ينسى تصريح مساعد وزير الخارجية الكويتي لشؤون المراسم اللي قال فيه : ان تصرفات ( البلطجة ) السفارة الفلبينية في البلاد تعد اختراقا وتجاوزا للخطوط الحمراء لسيادة دولة الكويت !.. واضم صوتي لصوت اخوي المعاق واطالب بعدم السماح لمن تسول له نفسه العبث بأمنها وسمعتها الدولية .

الشايب : ما عليه يا اخوان وأنتم تتكلمون بهذا الموضوع ( اعتبروني المتمولس ولا تواخذوني لا قصدي شريف ) تذكرت قصة النمر والقرد والاسد ايام ما كانوا يتكلمون !.. يقولون النمر كل ما شاف القرد عطاه طراق وهو يقوله ليش مو لابس طاقية ؟.. وان لابس الطاقية عطاه المقسوم وهو يقول له ليش لابس طاقية ؟.. القرد من كثر الطراقات حمرت وزرقت خدوده زبن ( مفرد ازبنوا اللي راح نسمعها كثير هالصيف عند هبوب الغبار ) الأسد يشتكى !.. أرسل الأسد واحد من مطاريشه للنمر اللي حضر بالحال وهو يتراجف من الخوف !.. قال. له الأسد علامك على القرد ؟.. قال يا طويل العمر القرد فاقع مرارتي !.. قال الأسد ان كان جذا خل ضربك بحدود القانون !.. اشلون طال عمرك ؟.. اطلب منه يجيب لك تفاحة وان جابها حمراء لته كف قوله ليش ماجبتها صفراء ؟.. ما أطولها عليكم راح النمر وهو طاير من الفرحة بفكرة ملك الغابة العبقرية وأول ما شاف القرد قاله ( خذ ياله ) آدلف جيب لي تفاحة ؟.. وبما ان القرد تربية شوارع وما تطوف عليه هالسوالف جاب تفاحة حمراء وخضراء وصفراء !.. ولعت لمبة القهر عنده وطار عقله وعقبها صكه اصطار من اللي يحبه قلبك وقال له ليش لابس طاقية ؟.

الخبير : الله عليك ياحبيب والديك انا فهمت بتقصد ايه ياحج والنعمة انت حريف كوره اوي اوي !.. ده انت ابو المفهومية ربنا مايوقعش خدودي الوردية بسكتك .

المتمولس : ‏لو يعرضون حياتي كمسلسل بيوقف عند الحلقة الثانية بسبب قلة الاحداث و تكرار السيناريو .. وفي هذه الاثناء رفع على مسامعنا الشيخ زغلول اذان الظهر .
محمد خلف الشمري

ترك الرد

Please enter your comment!
Please enter your name here